Adawh  ngaimi pangpar, Athiang ngaimi ti le Duh a nung hringhranmi hramhring hna zong nunnak an ngei. An i dawh caan cu anmah ca ah a sunglawibik a si bangin CCF ca ah sunglawibik caan cu kumkhat chung ah civui zawh in vok zuanh bu he kan zawh tawnmi puai “ Chuseok” puai hi a si. “Chuseok” timi cu “ Tho” sullam he aa khat__ a tuanbik cu ka t`ial ti lai lo. Cu bantuk i asunglawimi caan dam le lom te in a kan phaktertu Pathian min zong kan thangt`hat lengah ahlei in hlankhel te silo in thlarau rawl a kan petu ding ah Yangon in Rev. Peng Thang hna a kan cahpiaktu CCF-EC Upa hna cung zong ah lunglomh a um khun. Chuseok Committee cung hrim zong ah ahlei in lunglomh a um rih. 

Degree hun hmuh ni i degree luchin vanlei hlir in teinak ka hmuh cang ti le rian saupi hun t`uan i, dinh caan hun phak timi feeling cu anuam emem___ Nuamhnak tlanghnih
  khar lakah  kan i ceh caan kan ti hnga maw…. Tukum Chuseok CCF Camping tuah ah kan kalnak cu “ Gapyoeng a si i, Seoul khuapi i orhhlei kam ah a ummi a si. Chin House in nazi 2nak t`lawm kal asi. Minung 107 kan kal kho; i thawhkaa ahcun minung 102 kan si nain ahnu ah an rak phan chap hna. Chin House hmai in 26/8/2015 ni 1:20pm ah Motor sen rong pahnih in kan i thawh hna. Luke le John, le Marth le Mathew ti in motor pakhat veve icit a si lai tiah Chuseok Committee nih an kan thanh bantuk te in kan i cit hna. Kan lungthin azaang, kiam chung uammi luatnak ahmumi ko kan hluan; sehzung in an rak kan raaknak hna kan cawn thulh, Korea holh hna kan holh thulh. Kan caah nuamhnak aa thawk ni ti khawh a si.
T`hut dirnak le Cawnpiaknak: Tlang pahnih nih acehmi tiva hrek a tomi Khua Gapyoeng hmete i orhhlei kam Inn dot thum ah kan i thum hna. Atangbik cu Inn hngaktu Nupa an um i, kannih nih Coffee dinnak ah kan hman. Dot hnihnak cu cawnpiaknak ah hman a si i, khaan-nga leng le cawnpiak room ( Innpi) ti`in a um. Khaan-3 ah pa pawl hmunhma lak a si i, atangmi khaan-2 ahcun nu le hngakchia pawl hmunhma an la ve. Dot cungbik ah Speaker sawmmi Rev. Peng Thang le Chuseok Commttee (cheukhat) khaan dang veve in riah a si. Tutan i khuaruahhar a simi pakhat cu Ihnak kong ah hohmanh buai lo te in kan ummi hi a si i; daite in Innpi fikfa lakah a itmi zong an um, Mi hna kan hnawh sual ti ah harnak aa thimmi zong um a si. Pumpek in  chuankhin lei, Projector lei, Music lei, Cawnpiaknak lei,  Media lei le adangdang in CCF ca ah rian at`uanmi vialte zoh tikah lung a hmuih taktak. Kan i thawh hlan ah President Salai Sui Hmung nih,” Camping kal a si lai tiah thinphang in um lai u ci law,”  tiah a chim lengmang nain, Cawnpiaknak kan ngaih taktak tik ahcun kan chung in kan rak haal tuk cangmi Thlarau rawl a si caah a si rua caan dih hmanh kan hngal manh hna lo. Cauk tete ilak riangmang in hngalh t`hannak ( note) alami le phone in record ( speaker aw) a tuahmi zong kan tam ngai hna. “Lungretheih vansan in um caan i Pathian kan chawnh tawnmi hmanh khi kan ca ah  t`hat hnemhnak a um, tu bantuk in a camp. bak in a kan chiahmi nih hin keimah ca  hrim ah t`hatnak tampi a ka pek. Kei cu kaa fiang ngaingai,” tiah Gwuangsung lei in Upa pakhat nih a ka chimh! “ Kha hlan i Chuseok caan kan rak hman tawnmi kha arak t`ha tuk ve ko nain, nuamhnak a rak si caah caan adih tikah an dih ve colh hna. Hmailei kan nunlam ca ah kan idinh caan sunglawibik Chuseok nih arak kan pekmi kha rak hman khawh a rak si lo. Sihmanhselaw, tutan i kan theihmi cu hmailei kan lam t`hluan tiang ah t`hat hnemnak a kan pek lai tiah, ka zumh,” tiah  Mino Upa nih a ka chim rih.  Minung kan nunnak sullam ngeihternak ah Pathian nih kan caan cu a kan tlaihpiak i, a dih ciami cu khirh khawh tilo in a kan tuahpiak ruangah,  “Tuanbia cu Pathian hmanh nih a t`hleng bal lo” tiah an ti. Cu bantuk in a dong bal lomi Tuanbia chungah a dih kho tilo tuanbia kan t`ial t`imi hna cu a sunglawituk. Caan a dih cang nain, cawnpiaknak ruangah kan ichapmi Pathian bia nih hmailei kan nunnak ah baibal ca chung in “ Pathian cu Ka ke ca ah Mei Inn asi” a ti bantukin kan ca ah “Ceunak” asi lai tiah zumh a si. Nihnih le zaanthum chung Pathian bia kan ngaih cu pumpalulh zoh a huam ngaimi nih pumpalulh a zoh bantuk a si i, kan tha kan i seng, kan hngalh lomi ihalnak tete, kan rak haal tukmi Thlarau tirawl ruangah a dih manh hmanh kan hngal manh hin lo. Zaanlei ninem nih a liampi hmanh kan hngalh hlan ah “ Pathian nih Siter A Kan Duhmi” timi cawnpaiknak tlangtar cu sian lonak he kan lim. Donghnak zaan i mitt`hli he thlacam kha Korea ram CCF ah a um hmasabik a si bantukin Pathian nih kan ca ah “Siter A kan duhmi Lam” ah  a kan kalpi duahmah timi zong hmuh khawh a si.
Donghnak Ni le Sport: Pumpalulh cu taksa damhnak ca le minung fellowship ca ah a si an ti. Sihmanhselaw, luancia caan i pumpalulh chuih izuamnak nih arak hrinmi zuamnak ( I-ci-net lonak) nih team khat le team khat cu at`hli tete in iniar cianak a chuahter. Cu ruang ah a si lai ka timi cu Camping dongh zaan thawk cun Team lutlai pawl nih, “ Zei formation in, a nih kha ahmai ah kal lai, anih kha deffence ah, tbk,..” cu ready bak in timhnak an ngeih hna, an ihngilh bu hmanh in a chuih khoding phun khin an um 😀 . Chuihnak hmun certual cu kan riahnak hmun in suimilaam cheu tluk kal hnu ah 29/9/2015 ( Nihnih ni) 9:14am ah kan phan i, Puaikhatnak ah Marth le Mathew an i deng colh i, Marth nih 2-1 in an tei hna. Cu dih cun, Openning ceremony tuah a si. Tukum cu phundang ngai in ram ngeimi kan sinak hngalht`hannak ah tiah “ Ahme ram Lait`lang” timi hla zong sak a si lengah Mino Sport Coaching Staff Za Bawi Thawng nih pumpululh tuah khawhnak kong he pehtlai in lomhnak bia a chim. Mah dih cun John le Luke  an i t`hua colh. Sehding aa zuanhmi Cakei ko an hluan. Cerhmun chung ah Saya Duh Lal Lian cu Rampi a t`huat colh__ teng lak bawlung in! Zoh an nuam taktak. Cu tin cun Pumpaluh cu chuih a si i, Final ah athiambik team hnih a simi John le Marth an itong i, John nih 4-2 in an tei hna ca ah John cu 2015 Chuseok Champion an si. Pumpalulh chuih lio i thape tu hna nih thapek ning le Upa pawl nih mino hna ( celhtu) hna tha an pekning zoh tikah hmailei CCF kan i hawikomnak a t`hawnter chin lai ti’n zumh a si.  “Tutan cu kan Ule an ti kho taktak e, U Hei si, Pu Van Thang si, Borte pa si, U Thawng si, Cun, adang kan ule hrim kha an ti kho tuk. Ka dua, ka lunghmuihbikmi kan chim lai; Zing Chin Pa Coach t`uan hrim kha ka uar tuk” tiah  Senri Editor pakhat nih a chim. 
 
Adong lomi le adih bal lomi tuanbia chung ah at`lau kho ding nuamhnak sawhsawh silo in Khrihfa kan sinak thlarau thlaici  le CCF kan i hawikomnak hna caah CCF Chuseok kan hmanning cu lung ahmuih hringhran. Hmailei kan lam t`hluan ca ah atu caan hi abiapi tukmi a si. Hmunkhat te in kan rak sermi cu tuanbia ah dawhte in atang cang lai; rel t`han tikah “a nuammi__ feeling” zoh t`han tikah  “lung a hmuimi__ feeling” ruangah ah kan idawtnak hna cu vawleicung tlangkhat hnu tlangkhat  lonh in vanlei a sangbiknak ahkhin zuang in hmun zungzal chin ko seh!
 
 
Cawnpiaknak Video ( click and watch)
 
Atanglei youtube link ahkhin cawnpiaknak cu adotdot tete in ngaih khawh a si.
 
Pumpalulh Chuihnak:
 
Cawnpiaktu Rev. Peng Thang zong CCYC ( CCF Mino) nih biaruahnak an ngeih kho. Atanglei link ahhin rak ngaih khawh a si.
 
Hnephnop: 
Hmanthlak zong atanglei Facebook link ah zoh khawh a si.
Links 1: Facebook Photos
Links 2: Facebook Photos
 
Chan Bik Ceu