Saya Van Lian Chawn, India

Dantatnak ka inmi cu ka ca ah a ṭha, zeicahtiah na nawlbia kha a ka hngalhter. Na ka pekmi nawlbia cu ka ca ah vawleicung tangka vialte nakin a ṭha deuh. (Ps. 119:71-72)

Nunnak timi nih hin zei tin dah kan nunnak ah harsatnak le ngaihchiatnak kan tonmi vialte kan daihter, kan donghter khawh lai, ti i zuam khawhnak caan sunglawi a si. Harsatnak kan tonmi hna hi zei tin dah kan rak hmuh ve timi ah hin kan ca ah san a tlaihter le ter lo cu aa hngat. Minung tampi hna nih harsatnak kan ton tik ah zei dah Pathian nih ka ca ah a duhmi a si hnga ti ruat lo in kanmah duh poh in kan harsatnak ah cun kan buai tawn hna. Vanchiat tuk hna ah kan i ruat, ruahchannak ngei ti lomi hna ah kan i ruat tawn i cu ti cun, kan tonmi harsatnak nih mah le mah nunnak i lak tiang in an nunnak an donghter tawn. Cucaah, nihin kan nunnak ah kan theih a herh hringhranmi cu, “Zei Dah Kan Harsatnak Pinlei ah Pathian Timhmi A Si Hnga?” ti hi a si. Hika ah harsatnak ti lawng in ka ti i chimduhmi cu minung nih kan tonmi harnak vialte ka chim duhnak a si. Pathian nih kan harsatnak pinlei ah a rianṭuan ning phun nga in a tawi fiannak in kan vun zoh hna lai.

1. Pathian nih kan harsatnak hi lam ṭha a kan hruaitu ah a hman: Pathian fale hna nih kan biak Pathian philh in kan nunnak kan hman tikah hin, harsatnak pakhatkhat hmangin lam ṭha ah a kan hruai tawn. Asinain, cucu Pathian biathli a si ca ah mi tampi nih kan thei tawn lo. Missionary Rual Hleih Sang nih hla a rak phuahmi ka uar tuk mi cu, “kan hal lo thluachuah cu harnak a si” a timi hi a si. Saul siangpahrang cu Pathian nih a pekmi chimhhrinnak cu aa theihter lo caah Pathian nih a rak hlawt. David tu cu Pathian nih a pekmi sarsatnak cu a hmuh fiang i Pathian mithmai a kawl ca ah Pathian nih thlua a chuah i Messiah hrinsortu tiang ah a hman. Cathiang nih, “A zei maw caan ah cun kan ziaza i thlen awkah harnak ton kha a herh tawn” (Proverbs 20:30) a ti. (kan hal lo thluachuahnak cu harnak a si) ti a si lai.

2. Pathian nih kan harsatnak hi Amah fa tak kan sinak ding ah a hman: Harsatnak kan ton tik ah kan theih zungzal dingmi pakhat cu, Pathian nih kan zumhnak a kan hneksakmi a si ti hi a si. Job a nunnak kan zoh tik ah Pathian nih a ngeihchiah chawva in a chungkhar tiang a lakpiak dih nain Job nih a zumhnak hlaw lo tein Pathian aa tlaih peng ca ah a donghnak cun Pathian nih a let in thlua a chuah timi kan hmuh. Cucaah, na tonmi harsatnak ah hin Pathian cu i tlaih peng ko. Fa taktak kan si ahcun harsatnak pinlei ah cun na ca ah a sunglawi tuk mi thluachuahnak a um ko, ti hi a si. Sui thiang cu minung aho poh nih duh a si. A tling kho lomi minung hmanh nih a ṭhami le a tlingmi kan duh ahcun a tlingmi vancung khua i a ummi kan Pa Pathian nih cun zei tluk in dah a duh lai. Cucaah, Bible nih harnak phunphun nan cung i a phak tik ah lawmhnak in khat ko uh, zeicahtiah nan theih lomi cu hi harsatnak nih nan zumhnak an hneksak hna ti hi a si. Cun cu nih in lungsaunak a pek hna lai, (James 1:2-3 NCV) a ti.

3. Pathian nih kan harsatnak hi kan nunnak cawnpiaktu ah a hman: Cawnpiaknak cheukhat hi kan harsatnak le kan sungh zatlaknak lawngin kan rak ruah tawn. Cucu kan palh, pa nih a fa a cawnpiak bantuk khi a si. Ngakchia cu nu le pa nih a linmi meiṭil si kha tong hlah an ti nain a thei lo i a tongh tik ah cu a tonghnak cun zei bantuk a si kha amah tein a cawng i cu ti cun amah tein aa siamremh tawn. A caancaan ah cun vanṭhatnak, puitling nunnak, hawile he i hmuhthiamnak le Pathian i bochannak hna hi kan sungh zatlaknak in kan rak ruah caan a um tawn. Harsatnak hi vanchiat thil ah ruah ding an si lo. Pathian nih kan ca ah a remruatmi a si. Salm ca ṭialtu nih cun, “Harsatnak pek ka rak si hi ka ca ah a ṭha, cu ti cun na nawlbia hna cu ka cawng kho”, (Ps.119:71 NKJV) tiah a ti.

4. Pathian nih kan harsatnak hi a kan vengtu ah a hman: Kan harsatnak hi thluachuahnak a rak si i, luattertu le nun chimtu an rak si. An chim tawn, kawifa hna khual an tlawng i a phaknak ding khua ah minung raithawinak tuah an duh i hmape a ngei lomi a pum a tlamtlingmi kha an rak kawl. An khua a rami poh kha an rak chek hna ti a si. Kawifa hna cu an kal ko i an phanh lai ah a kawi nih a kawipa hmape a ngeih lo kha a theih tik ah a lung a thlen cang ti a si. Asinan a kawipa nih cun, zei hmanh a thei lo. A kawipa cu hmai ah a rak kal i cu ti cun a kawipa hliamnak ding kha a rak kawl i cu ti cun a kawipa cu aa hlim taktak i a thinhung in biachia vialte a chim dih ti a si. Asinain, khua an phak tik ceo ah thil sining a theih i a kawipa sinah lawmhnak bia a chim ti a si. Cathiang nih, “Nannih nih cun harnak pek kha nan ka timh, asinain Pathian nih cun cucu ka ca ah thil ṭha ah a rak i timh,” (Gen.50:20 NIV) tiah a ti.

5. Pathian nih kan harsatnak hi mitling kan sinak ding ah a hman: Harsatnak kan cung i a phanmi hi ṭha tein kan rak theih thiam tik ah, cu nih mitling ah a kan ser. Kan nunnak a remh i cuticun thil ṭha tuah duhnak kan ngei. Thil ṭha kan tuah tik ah, cu nih cun hlawhtlingmi ah a kan ser, kan hlawhtlinmi nih mi pakhat ah a kan ser. Mithiang Paul nih a chimmi cu, “Cun harnak kan inmi zong ah hin kan i lawm ko, zeicahtiah harnak nihcun in khawhnak kha a kan ngeihter i, in khawhnak nihcun ziaza a kan ngeihter i ziaza nihcun ruahchannak kha a kan ngeihter; ruahchannak nihcun a kan deuh lo,” tiah (Rom.5:3) a ti. Cucaah harnak hna kan ton tik ah hin Pathian nih zei dah a ka duhpiakmi a si ti hi theih i zuam in Pathian sinah kan sining vialte phuang ko hna usih. Zeizong ti khotu Pathian kan ngei. Pathian kan philh sual ahcun kan harsatnak nih phun dang pi hna in a kan mer sual ko lai. Hebru ca ṭialtu nih cun, “Amah hrimhrim nih khan tukforhnak le temhinnak kha a rak in cang ca ah tukforhnak a ingmi kha a bawmh khawh hna,” (Heb.2:18) tiah a ti.

Biadonghnak:

Pathian nih fa ah a cohlanmi hna cu thil pakhatkhat hmangin hneksaknak a tuah lengmang hna. Cu a kan hneksaknak cu kan cohlang kho tawn lo, kan phurh khawh tawn lo tik ah kan tlukrilhnak ah a cang tawn. Kan cung ah harsatnak pakhatkhat a tlun tik ah Pathian sawm lo in kanmah tein chim phoih kan i zal. Cucu Pathian nih a kan duhpiakmi a si lo, amah sinah kan nun ap i amah bochan ding kha a kan duhpiakmi cu a si. Lawmh caan lawng ah Pathian a thangṭhatmi siloin ngaihchiat ton caan zongah amah a thangṭhat khomi si kan herh. Kan harhsatnak pinlei ah Pathian nih kan ca ah tinhmi a ngei ko ti hi hngal hna usi.