Senior Judge Kim Jung-hak le President Moon hi caan saupi aa kom cangmi an si i Judge Kim nih President Moon hi ka nunnak khamhtu tiah a ti. Kum 64 a si cangmi Judge Kim nih a chimmi cu Moon hi kan nunnak ah thil harsa ka ton caan le vansang in ka um caan ah a ka bawm zungzaltu a si hlei ah biaceih bawi zong hi amah thawngin ka hmuhmi a si tiah a chim. Kum 50 chung hawikom kan si bantuk in ka chim khawhmi cu Moon hi upat tlak tein a nungmi a si, tiah The Korea Time i a unau nu a simi Hankook Ilbo ah Kim nih a chim.

Kim, Moon le an hawile tiin Kyungnam in siangniamrun le siangsangrun an rak kai lioah hin Kim cu
a ngakchiat lio tein polio timi zawtnak phun khat a ngeih ca ah lam kal aa harh ngaingai. Cu tik ah Moon nih hin a zal a beipiak tawn i, cu tin sianginn an kai tawn. Cu ti a kal kho set lomi a hawipa Kim a bawmh tawn ca ah a caan cun sianginn class hna a tlai tawn. Rak ka kaltak ko, na tlai sual lai ka ti zongah keimah he ngol lo tein a kal ko. A fiang komi cu rak ka kaltak seh law cu ka tlu ko lai. Cu ti dirhmun i a ummi ka si ca ah Moon cu sianginn tlai kha aa thim deuh, tiah Kim nih a chim.

Voi khat cu siangsangrun ca cawn kum ah sianginn lengchuah(outing) a um i, kei cu kal lo kaa tim nain Moon nih thazaang a ka pek, a ka sawm peng i kan kal. Kan pahnih cun kan khual lam cu hmuansam te cun kan kal hnu ah ka kal khawh ti lo ca ah Moon nih a ka puak. Kan i din pah, kan kal pah. Kan lengchuahnak hmun kan hung phanh cun lengchuah ṭem kha a rak dih cang. Asinain, cu khual lam cu ka nunnak ah a sunlawi cem caan a rak si tiah a chim. Moon lawng nih a rak ka puakmi kha an theih tik ah lawilei cu kan hawile dang nih an ka puak ve. Siangsangrun kum khatnak kan kai lioah hin a fa cem kan rak si. Moon nih a rak chimmi ka philh khawh lomi cu mifa ka si lai lo a timi hi a si. A keng in a rak ka puakmi nih harsatnak a pe lo. A taktak ah, a kum hnihnak kan kai chungah 10cm bak a ṭhang.

Kim nih a chim ṭhanmi cu Moon bawmhnak tel lo in hi biaceih bawi hi a tlai kho ding ka si lo. Seoul National University in law a lak hnu ah pumpak chawlehthalnak tuah aa tim nain a thlawhtling ṭhan lo. Moon nih a hawipa Kim cu a ke in a vun domh ṭhan. A fiang ngaimi cu, caan har chungah ka rak um sinain Jae-in nih Bar Exam ca ah i tim ṭhan law a dihheumi cu kan liampiak lai tiah ruahnak a ka cheuh. Busan ah Lawyer rian a ṭuanmi Moon nih tangka luhchuahnak ah a rethei ngaimi Kim cu a exam a dih hlan chung a cauk cawknak le a duh herh tiang in kum hnih chung a zohkhenh. Kim nih a chim nolhmi cu Moon nih hin ram chung rualremnak a kawl ko lai. President thar nih keimah sinah a rak tuah bantuk in a derthawmmi hna lei ah a ṭang lai timi ruahchannak ka ngei, tiah Kim nih a bia a donghter.

Ref. The Korea Time