Rooney Thawng, Busan

Pathian mi hna Sehtan nih hnuhnung bik a doh hna nak hriamnam cu hngalh khawh lo ding muisam thleng in tukforhnak phungtling in a timhtuah. Cu timhtuahnak he a kan bawh pengtu Sehtan nih cun second pakhat hmanh luat lo in kan keneh a kan zulh. Khirhfa pakhat a vun daithlang le cangka cun tuhforhnak nih a thinlung ah hmunhma lak ding in a rung luhhnawh colh. Cu tik ah ṭih a nung tuk. Zumhnak a dermi thinlung cu Sehtan ta a si ko cang.

Khah, atu Khirhfa na thinlung na ṭhangh i naa ralring zungzal a herh cang hih! Kan ziaza a simi kan puan kha tuufa thisen in thiang lakin kan suk caan a phan cang. Iuahnak thlarau ca rianṭuan thathutnak hna tei i zuam i, ziaza ṭha bik mi si i zuam caan a si cang. Pumsa cu thinlung nih a uk awk a si. Duhnak cu dawtnak in kan tei a herh. Kan hmurka kan lei kan daithlanh ruang le sual thurhnawmhnak i kan i hnim peng ko ahcun ruahnak ṭha le dinfelnak cu kan thah hna a si ko hnga. Minung thinlung/thlarau a hrawk khotu sin, i vennak ding phaw tampi hna lakah kei ka biathli cu “Kan biachim ah siseh, kan tuahsernak ah siseh, Thiang Thlarau a dohtu, mi thinlung a zawttertu biachim hi hrial hna usi,” ti hi a si.

Na biachim kaa khat nih na thlarau ca ah zungzal nunnak le zungzal hrem hmun a phakter khawh tihi lunghrinhnak ngei hlah. Cathiang chungah kan hmuhmi cu, “A sinah aa thlaimi misual hna lak i pakhat zong nih a hauh, Khrih cu na si lo maw? I khamh law kanmah zong kan khamh ve ngat, a ti. Sihmanhsehlaw a dang pakhat nih cun a mawhchiat, Pathian na ṭih lo maw? I tluk tein hrem kan si hih, asinain kannih pahnih hi cu hrem awk hrim kan si, kan tuahmi ruangah kan tonmi a si ko; hi pa tu hi cu zeihmanh a sual ṭung lo, a ti. A thawh I, Jesuh, na pennak na phak tik ah rak ka philh hlah, a ti. Cun Jesuh nih, Biangaite kan chimh, nihin ah Paradis ah ka sinah na um lai,” a ti (Luka 23:39-43). Cucaah zumtu mifa hna nih kan i ralrin a herh peng mi cu kan bia kaa khat ah hin dawtnak le huatnak, rualremnak le ṭhencheunak, thihnak le nunnak hna an um ti hi hngal hna sih ti ka duh. Nifa kan nunnak ah timhcia te le ralring tein a um zungzalmi si ko hna usi.