Dr. Aung Myint Thang

CCF nih chuahmi Senri cazual ah biaruah khawhnak caan kan ngei hna caah tampi kai lawm. Kan nih innchungkhar nih cun CCF nih nan kan dawtnak hi kan philh kho bal lai lo. Ni kum kan fa a lung operation an tuah lio ah phaisa in tampi nan rak bomh hna hlei ah, nan rak len hna, nan rak riah hna, cun thla zong nan cam piak hna ca ah nan kan dawt hna hi a lian ngan ko. Dawt ai hlawhmi zong khi kan sin a lo in nan kan dawt ca ah tampi kan i lawm ti kha kan innchungkhar aiawh in chim ka vun duh hma sa. Bawipa tu nih nan kan dawtnak in cham ko hna seh.

Senri Seminar 2015 donh zaan Lailaam

Hi ka ca tialmi ah hin biaruah kan duhmi hna cu, Korea le Laimi kan i pehthleihnak kong hi asi. Korea nih hin Laimi an kan tthathnenak hi a tam hringhran ko. Mi tampi nih phaisa kawlhawlnak ram ah kan hman, a cheu nih fimthiamnak cawnnak ram ah kan hman. Cun a cheu nih riantuannak caah le hawi ttha i kawlnak ram ah kan hman hna. Tu hnu zong ah Korea hmang in pathian nih Laimi thlua a kan chuah lengmang ko lai ti zumhnak le saduhthahnak ka ngei.
Zatlang nun, thinlungput le nunphung he pehtlai in Korea le Laimi hi i lawhnak tampi kan ngei hna. Cun, kan i ralchanhnak (kan i dannak) zong tampi a um fawn. Kan i ralchanhnak cu pakhatnak ah, Korea cu mah nak in a upa le senior pawl, abik in nu le pa a upatmi miphun an si. Kan nih Laimi cu ..
kanmah nak upa deuhmi sinah a ning a hngalmi kan tam tuk. Nu le pa zei a rel lo mi zong kan tam. Hngakchia ninghngal kan tam tuk. Nizan naite i a piangtharmi nih, kum 30 pastor a ttuan cangmi pa kha zeihmanh i rel lo kan hmang. Nizan nai i Korea a hawng phanmi pa nih Korea i kum hra a um cangmi pa kha Korea kong cawipiak ai timmi kan tam. Hi zawn ah hin Korea le Laimi kan i dannak pakhat cu asi.
Pahnihnak ah cun, kan min sakmi a sullam ai ralchan. Laimi nih “Thang” timi hi kan i sak duh ngai. Korea holh cun tihang tinak asi. Bawi Cin Thang ti cu “Uico sa hang” tinak asi. “Al Thang” timi zong hi rawl min asi. “Vang Ku” ti cu “Vawih” tinak asi. Anmah Korea min zong hi kan nih Kawlram mi ca ah cun min chia cem le min ningzak lawngte an si ve. “Lee” ti mi mincheu hi a tam ngai le cucu “Li” ti in a aw an chuah. A sullam cu Kawl hawlh lebang cun leh hngam ding hmanh a si lo. “Cho” timi zong hi an tam ngai le, hi zong hi “Chu” ti in a aw an chuahmi asi fawn. “Park” timi hi an tam ngai fawn le, hihi Kawl nih a aw chuah an thiam lo le, “Pat” ti in an chuah hawi le cu zong cu Kawl hawlh cun asi te khi asi ti loh. Kan mah kan Lai holh zong in “Park” ti cu bia thurhnawm khi asi. “Yang” ti mi zong hi an tam ngai. Cu pin ah “Mr. Na” hei ti te hna, Mr. “Eui” hei ti te hna le “Mr. Kawh” hei ti te hna hi an tam ngaingai. Saya Thawng Hup nih kei Korea ka hawipa cu a min ah Rev. Kawh Na Cho a si a ti. Atu ka van tialmi Korea min cheu pawl hi Korea nih an i sak ngaingai mi min cheu an si hna ca ah Korea miphun dihlak ah hin zakhat ah sawmnga nih cun an min cheu ah hin Cho le Yang, Lee le Park, Eui le Na le Kawh lawngte an i sak hna.
Kan min le kan nunphung cheu khat ah i ralchanhnak um ko hmanhselaw, Korea miphun he i komh khawh cu rak i zuam cio ko hna uh. Korea cu an ram zong a thianhlim bantuk in a mi nung zong hi an thianghlim. Cun mi biaruah zuammi an tam le a komh an nuam. Asinain an ram ah hin holh phun khat, nunphung phun khat le miphun phun khat lawng a ngeimi an si caah an nunphung nai hrawm lo ah cun Korea cu tthittha in na kawm kho hna lai lo. Korea komh na duh hna ah cun anmah Korea bantuk te ah nai can ve a hau.
Korea pawl hi mi ttha phun maw an si mi sual phun dah? Mitangdor te in na um ah cun Korea pawl hi na chung ah an ttha ngaingai lai. Ninghngal phun, sual nawn phun, lawklei nawn in na um ahcun tar chia te zong nih an in ttih lai lo. Riantuannak zong ah nangmah na in le na lo rian ttuan te in duhsak hakkauhnak le zawnruahnak te he na ttuan piak hna ah cun Korea pawl hi na ca ah mi ttha lawngt e an si lai. Hrawkhrawl phun in na ttuan piak hna ahcun Korea hi mitha lo tak ah na ca ah an i cang lai.