Zilpici Cinzahh

Voi khat cu ngatlaipa pakhat hi rili tikam thingkung tangah khin zaangdam te khin a ṭhu i aa din. Cuti thlifim don pah bu i, aa dinh pah cun hla aa sak thliahmah i, nuam ngai in a um. Cuti tha dam tein a um lioah cun mirumpa pakhat hi cuka hmun ah cun ruah lopi khin a vung phan. Mirumpa nih ngatlaipa rianṭuan loin cuti a um ko cu a hmuh tik ah cun a lakka i cuti caan pamhhmaih cu dah ngai a ti. Ngatlaipa sinah cun zeica’hdah rian zeihmanh ṭuan lo in hiti hin caan paam in naa hngilh salam ko tiah a hal. Ngatlaipa nih cun a zatawk fang nga kaa tlaih khawh ko cang tiah a leh. Cuti cun an biaruah cu an hun peh.

Mirumpa: Caan na ngeih rih ko bu ah zeicahdah cu na ngeihmi caan cu nga tam deuh tlaihnak ah na hman lo?

Nga tlaitu: Nga tam deuh tlai hmanh ning law zei tin dah ka um hlei hnga?

Mirumpa: Nga tam deuh na tlaih si ahcun na zuar lai i, cuticun phaisa tampi na hmuh lai si.

Nga tlaitu: Phaisa tam deuh cu hei hmu ning law zeiti’n khin dah ka va um lai?

Mirumpa: Lawng le lengkhang lian deuh naa zalh lai hen ta.

Nga tlaitu: Lawng lian le lengkhang lian deuh hei ngei ning law zei tin ka um lai?

Mirumpa: Ti thuhnak deuh ah na kal kho lai i, minung tampi nga tlai dingin naa chor/fial hna lai i, phaisa tampi na hmuh khawh lai!!

Nga tlaitu: Phaisa cu tampi in hlawh/hmu hmanh ning law zei tin dah ka um hlei lai?

Mirumpa: Phaisa tampi na hmuh ahcun keimah bantuk hin mirum lian ah naa chuah ve ko lai!

Nga tlaitu: Cu bantuk mirum ka hei si ah teh zeitindah ka um hnga?

Mirumpa: Na rum tik ah cun nuamsa tak in na tlongleng lai i, na duhning paoh in naa din kho cang lai cu.

Nga tlaitu: Cucu hme atu ka umning le ka siningte hi a si ko cu! Khoi hun i dinta rih kun ning luau!

Nun nuam le tha dam tein umnak dingah hin phaisa le rumnak hi a biapi bikmi a si lo. Na nun ah khan na lungtling law, Pathian ṭih law, na cantawk ah lungsi te pom le cohlan i zuam. Na nun aa lawmh ahcun mirum bik nakhmanh in na lawm lai i, naa nuam deuh lai. Lawmhnak le nuamhnak hi phaisa in cawk khawhmi thil a rak si lo. Mi tampi nih lunglawmhnak te hna, hnangamnak te hna hi phaisa in cawk khawh a si hlah maw tiah phaisa tampi ngei dingin fakpi in rian an ṭuan i an i zuam. Lunglawmh, hnangam le zaangdam i tim in kan i zuamnak ah kan thadi i, kan zaang a ba, pum pawcawmnak ca ah rawl hmanh ṭhaṭhi ei manh lo tiangin rian kan ṭuan ṭheo.

Phaisa sal ah i can mei hi ṭih a nung hringhran dah! Thluak nih phaisa lawngte aa hruh/ruah tik ah cun minung nih hin Sertu Pathian kha a philh i phaisa lawnglawng kha a buaipi khawh cang. Chungkhar khuasak tintuknak ca ruat in pumhkhomh tlolh tiang hna in kan um tawn maw? Zarhkhat chung phaisa hmuh nakding ah fakpi in rian na ṭuan ruangah Pathian ni ah i pumhkhomh zuam lo in na um ṭheo tawn maw? Pathian nih cun minung hi thlanti put in nun pawcawmnak ca rianṭuan dingin a kan ti. Asinain phaisa saltaan phahnak le Sertu Pathian thangṭhat tlolhnak ah kan hman ding cu a si lo. Mi pakhat nih cun, “Ka rumnak hi ka thil ngeih tam ruangah siloin ka herhmi a tlawm ruangah a si,” a ti. Mirum milian bantuk nun duhnak le a ṭha bik ngeih i timhnak nih hin phaisa sal ah a kan hnuh ṭheo tawn.

Vawleicung ah hin sifahnak cu a um peng ko lai a dong kho ding a si lo. Lai phungtluk ah “Thinghmui san chel, ramh san chel” ti a si bangin sifah peng phung zong a si lo i, rum peng rai zong a si ve fawn lo. Pathian nih unau le cingla rualchan, miphun khat le Khrih ah unau a kan siternak tu hi kan hmanthiam a herh bik ko. Chim duhmi cu ti, Sertu Pathian nih a kan siter cu sifah le harsat caan ah aa bawmchan dingah Pathian nih a kan timh ca ah khan a si. Cu ve bantuk in khua khat, miphun khat kan si zong hi Pathian nih kan harsat caan ah aa zuanhnawh ding le aa bawmchan dingah a kan tinhpiakmi a si ko.

A rum deuh an um bang a sifak deuh mi zong kan um ko lai. A rum deuh nih sifak deuh philh lo in bawmhchanh dingtu kan rian a si i, a fimmi nih a hrut deuh zong kha kan nehsawh le kan zomhtaih hna awk a si lo bang catang sang a phan zong nih catang ngei lo deuh kan miphun le kan unau, Khrih ah kan unau zong kha kan thlanglamh hna awk a si lo. A lam kip in aa bawmchan dingah Pathian nih a kan sermi miphun, Khrih ah chuak khat dih kan si. Miphun ṭhangcho timi hna zong khi khat le khat thazaang an i pek ruangah le an i dirhṭhoh, an i bawmhchanh tam deuh ruang tu ah a si ti thei in, miphun dang kan tluk deuh hna lo ti kan theih ahcun khat le khat i bawmhchanhnak lei ah miphun dang bangtuk in kan i bawmhchanh ning a fil deuh, a tlawm deuh rih ti tu ruat in pumpak cio thazaang chuah in i bawm cio hna usih law thazaang i pe zungzal rih ko hna usih.

Miphun chungah siseh, unau chuakkhat cio chungkhar tinkip cung i kan zoh tik ah cun aa bawmchan deuh poh le thazaang aa pe deuh poh cu sinak sang, catang sang le reng sang thluachuahnak a hmumi an si ti kha kan theih khawh lai. Cucaah cun kan dihlak pumpak cio unau kan sinak, miphun khat unau kan sinak i thei in kan harsatnak cio cungah pehzulh in kan i zuanhnawh i thazaang kan i pek zungzal ve a si ahcun miphun dang bantuk in kan ṭhangcho ve ko lai.

Ngeih luaimai lawng hi rum taktak kan ti kho lo, kan ngei luaimai hna lai lo nain kan thinlung tu a rum tiah i ruat in miphun dang bantuk in ṭhanchonak leiah siseh, a lam kip in harsatnak cio ah i bawmhchanh hi i rep zungzal ko hna usih.

Galati 5:10 “Cucaah ṭhatnak tuah kha baa hlah usih: kan ngol lo ahcun a theitlai kan zuun caan kha a phan ve ko lai. Cucaah a caan kan ngeih fate, mi cungah ṭhatnak tuah kha i zuam usih law zumhnak lei i kan rualchan a simi hna cungah khan i zuam khun usi.”

(Hi a cunglei cabia tawite hi MKD timi chungta kha ka leh i ka hun belh chapchuan chinmi a si.)