Genesis 1:26 ah, “Kanmah mui an keng lai i, kanmah he kan i lo lai”, ti’n Pathian muisam keng in minung a sernak kan hmu khawh. Minung hi Pathian he aa lo ding in ser a rak si. Asinatein, Pathian kan si te lai tinak cu a si lo. Pathian sinak dihlak kan i hrawm lai ti zong a si fawn lo. Minung nih Pathian muisam kan lawhnak cu tlawmte lawng a a si. Cucaah, zei ban tuk zawn te ah dah Pathian muisam (image or likeness of God) keng kan si? tinak kong tlawmpal te’n ka `ial lai.
           Bible chung ah Pathian hi thlarau a si ti in a `ial (John 4:24). Pathian muisam cu vawlei taksa (flesh and body) a si lo ti cu a fiang. Pathian muisam kengmi minung tinak cu a lenglei taksa sinak si lo in, chunglei sinak deuh tu a rak si. Cu chunglei sinak hi thlarau sinak a si. Mah thlarau sinak kan ngeihmi ruamg ah cun sertu Pathian he kan i pehtlaih khawhnak cu a si. Cucaah, Pathian he kan i lawhnak le a muisam keng kan sinak cu lungthinruahnak/fimthiamnak (mentally or intellectually) , nunziaza lei (morally) le hawikomnak lei (socially) ah a lang.
Lungthinruahnak/Fimthiamnak lei ( mentally/intellectually):  Minung hi fak pi’n khuaruah khawhnak a ngeimi kan si. Cun, dawtnak, zaangfahnak, bawmhduhnak, lunglawmhnak, tbk.. pawl a ngeimi zong kan si. Khuaruah har ngai in thil phunphun zong kan ser khawh. Mah ti ban tuk lungthin, ruahnak le fimthiamnak pawl kan ngeihmi hi Pathian muisam keng kaan sinak cu a si.
Nunziaza Lei (Morally) :    Pathian nih minung cu ding te le tlamtling te’n a kan ser. Minung nih `hatnak cu kan duh i, sualnak cu kan huat dih ti cu hngalh dih cio a si. Cucaah, sualnak a karhlonak hnga  ca ah phunghram le zulphung (bylaw) a phuphun in minung nih kan ser hna. Sualnak an tuah ahcun a sualnak bantuk in dan tat a si i, `hatnak an tuah ahcun an `hatnak bang thang`hat an si. Minung nih `hatnak a tuahtu hna cu kan dawt, kan sunlawih, cun kan thang`hat hna. Mah bantuk nun ziaza kan ngeihmi  hi Pathian mui kan lawhnak cu  a si.
Hawikomnak lei (Socially):       Pathian nih minung a sernak cu Amah he i hawikomhnak (pehtleihnak) ca zong ah ser a rak si. Eden dum chung ah Adam amah lawng i um cu a `ha lo a ti ca ah Pathian nih Evi kha Adam ca ah a rak ser piak. Adam amah lawng um khawh si lo ca ah hawikom `ha bik Pathian nih a ser piak ti cu a fiang. Pathian zong hi thumkomh (Trinity) Pathian a si ca ah  pakhat le pakhat an i pehtleihnak kan hmu khawh. Thil an ser le an tuah ah hin thumkom (Trinity) Pathian an sinak hi a lang (Gen. 1:26; Gen. 3:22; Gen.11:7; Isaiah 6:8). Minung hi mah pi lawng in um khawh kan si lo ti cu kan i fiang dih cio lai dah. Cucaah, nupi le va kan ngei, hawikom dawt kan ser, biakinn ah kan i pum tbk..in hawikomnak ah pakhat le pakhat i pehtleihnak kan ngeihmi nih hin Pathian muisam keng kan sinak cu a langter.
Biadonghnak:  Pathian nih minung a rak kan ser ah hin sualnak ngei lo (sinlessly) le a dingte (righteously) in a rak kan ser. Asinatein, Pathian nih Adam a rak pekmi duhthimnak (freedom of choice) kha Pathian duhlonak leiah a hman ca ah Pathian muisam a rak kengmi minung cu sualnak mui zong a keng chih colh ve. Vawlei nun ning in kan nun ahcun kan chung i a ummi Pathian muisam cu a lang kho ti lo. Sihmanhsehlaw, Pathian nih minung cu a fapa Jesuh zumhnak thawng in sualnak chung in a kan luatter. Cucaah, Jesuh a zummi paoh cu Pathian muisam chung ah nun thar in nun a si cang. Sualnak le thil `halomi paoh hi vawlei muisam an si i, Minung nih Pathian muisam kan kennak cu, ” dinfelnak, thianhlimnak  nun kan duhmi nun ziaza, midang ca ah `hatnak thil `ha ser kan duhmi lungthin ruahnak le fimthiamnak, pakhat le pakhat dawtnak he hawikom ser duhnak kan ngeihmi  hna hi, “Pathian muisam kan kennak” cu a si”. (Efesa 4:24).

By Pastor Joshua Mang Neih Cung
Reference: Created in God’s image by Anthony Hoekema