CCF Pastor Ceu Sang Kung le CCF member’s Sang Bawi

Baibal timi cu cauk tiah auh a si i cu cauk cu `ialmi tiah kawh a si `han. Cu tialmi cu athiangmi cauk tiah kawh a si `han. II Timothy 3:16, Heb 4:12 ah fiangte in a kan cawnpiakmi kan hmuh khawh hna.


Pathian Biathiang a sinak
  1. Genesis in Biathlam tiang hi aa domi le aa kalhmi a um lo tiah zumh le ruah a si.
  2. Ahman i biadik a si tiah hmuh khawh a si.
  3. Chan, Kum le caan aa theng lengmang nain atu caan tiang ah aa kalhnak a um lo.
  4. Profet pawl nih an rakchim ningte in a si peng ko. Biakam hlun ah achimmi kha         biakam thar ah a tlam atlinter zungzal (Makah 5:2).
  5. Amah Pathian biatak a sinak (John 10:35).
             Kan Baibal hi Pathian nih akaachuak bia voi 3800 tluk a um an ti. Levitikas 4:1, Mathai 28:19 mah kha amah kaachuah bak a si tiah Baibal thiamsang nih an kan chimhmi cu a si. Cucaah Pathian nawlbia hna hi abiapi taktak i 1Korin 14:37, “Zei bantuk minung a si hmanh ah Pathian bia a si ti theih herh”. 2 Piter 1:21, “Profet hna bia cu minung duhnak menmen in achuak lo thiangthlarau nih a fial hna caah”, 1 John 4:6 “biatak le tak lo thleidan khawhnak a si ee a ti”.
Baibal hi Mi Pazeizat nihdah an T`ial?
       Uk zeizatdah a um, azapi 66 a um i, biakam hlun 39 a si i biakam thar 29 a si. Minung 40 tluk nih an `ialmi a si. Genesis in Deuteronomy kar hi Moses nih a `ial tiah an ruah. Josuah, David, Soloman, Amos, Daniel, Mathai, Luke, Peter le Paul ti in an `ialmi a si an ti. An sining le an dirhmun zoh tikah tampi an i dang ko nain Pathian bia anungmi a si caah aa kalh lo ti kha kan hmuhmi cu a si. Kum 1500 tluk rau in an `ialmi a si nain pakhat le khat aa doh lo i amah le mah zong atu 2014 tiang ah mah Baibal hi cu tu kan chan he aa tlak tilo ti hi a um lo.
An T`ialnak Ram
      Baibal  cu Europe ram, Asia ram le Africa ram hna ah tialmi a si tiah an zumh i Pathian biatak sermi dihlak caah le achungummi caah Pathian biathli taktak aphuannak a si ko tiah ruah le zumhmi a si. Vawleimi hi Bilian 6 leng kan si tiah ruah a si i, Bilian 2 tluk hi Khrihfa kan si i atang mi Bilian 4 hi Hindu, Muslims, Buddhist le biaknak hme dangdang an si hna. Baibal hi nitin chuah lengmang nam lengmang a si i azuar atambik le relbikmi ca hi Baibal a si ko an ti.

Pathian aa langhnak
        Salm 19:1 ah Pathian rian`uannak le tuahsernak a kan hmuhsak a ti i, mah cu phunhnih in kan vun zoh lai i a pakhatnak cu atlangpi ti a si. A pahnihnak cu ahlei in ti in kan zoh hna lai. Atlangpi cu acung Baibal bia hi a si i ahlei in timi cu amah Pathian (John 1:18) le Baibal (2 Tim 3:16) kha a si. Pathian cu kan hmu ballo nain a ummi sertu asinak hi sermi thiltampi zoh in kan hmuh khawh hna. Tahchunhnak ah thli a um kan theih kan hmu ballo nain kan caah nunnak hram a si fawn. Cucaah Pathian cu kan caah kan hmu ballo nain nunnak hram a sinak hi kan hmuh khawh. Cun Baibal cu Pathian nih a thaw a chuahhnawhmi a si caah tuchun caan tiang atlangpi in aa palh lo. Mah Baibal bia cu chan he aa tlak tilo tinak zawnte zong a um lo. I Peter 1:25, “Sihmanhsehlaw Bawipa bia cu zungzal in a hmun.” Tahchunhnak ah hlanchan ah Bawngpi par kaupipi hruk a si. Atu ah abimi tete a si `han. Hlan lio hmanthlak khi zoh law tuchan hmanthlak he cun a sining tampi aa dang lai…etc.
             Pathian thawhchuahhnawhmi a sinak cu a `ialtu hna hi sinak aa dangmi hmun dangdang cio in an rak `ialmi a si nain apalh lo i pakhat le pakhat (unity) an ngei,  aa bawm dih tihi fiangte in kan hmuh khawhmi a si. Matthai hi Ngunkhuaikhawl, Luke hi Sibawi, Peter hi Ngatlai, adangdang cio rian`uanmi an si nain Pathian thlarau nih a umpi hna caah an `ialmi cio hi palhnak le dohnak umlo in a kal`i kho i tuchun ah Khrihfami kan caah asungmi zeihmanh in thlen sianlomi ah a cang.
Pathian Bia theih
             Pathian bia kan rel deuhdeuh tik ah sullam kan thei i thlarau thianghlim duhnak kan theih deuhdeuh. Tahchuhnak..Ngaknu, Tlangval he um`i tam deuhdeuh duhnak theih piak deuhdeuh a si bantuk khi a si (1Jonh 1:1-2).
            Bawmtu Thiang thlarau kaan thlahpiak hna lai a ti (John 14:26). Biatak chungah an luhpi hna lai a ti (John 16:13). Luatnak lunglawmhnak kaan pekmi hna cu hohmanh nih an in chut kho hna lo (John16:22). Vancungmi upa bik Mikhael nih Moses ruak cu ho nih dah a co lai ti kong ah khuachia he an i el lio ah ‘Bawipa nih aan sik’ tiah khuachia cu a `hawl (Judas 1:9). Baibal tam deuh na rel tik ah na thinlung na ruahnak le na zeizong te Bawipa nih a thlen lai i vawilei hi na caah vanram a si lai (Heb 4:12).
             Baibal kan rel deuhdeuh tikah kan chambaunak le kan tlamtlinlonak kan i thei deuhdeuh, rua cu asang deuhdeuh a kun deuhdeuh an ti bantuk in theih deuhdeuh ah hin fim deuhdeuh a rak si. Korea Pastor pawl le minung pawl hi va hal hna hmanh Baibal hi voi 200 te hna a chuah cangmi an tampi lai. An kan teilo awk a `ha hrimhrim lo cu ta. Rawl kan ei taksa in kan `hang. Baibal kan rel tilo thlarau kan `hang tilo caah pakhat le khat kan chambaunak kan i hmu hna. Chambaunak an kan chimh tikah kan ing kho ti lo. Aruang cu thlarau rawl kan tam caah a si.

Biatlang kawmnak
             Jesuh zong vawlei a um lio ah harnak tampi a tong i ngaihchiatnak le lungretheihnak a tong tawn. Aruang cu Jesuh hi 100% hi minung a si i 100% hi Pathian a si. Mah caan lio ah Baibal kha fekte in aa tlaih zungzal i amah `hawnnak le fimnak silo in Baibal bia in sehtan kha atei zungzal ti cu Luke 4:1-8 kha rel ah afiang bik. Cathiang in khuachia cu a tei bak ko. Kannih zong cu Pathian i a roco hawi a kan siter ve caah azungzal in teitu kan si ding hi Bawipa nih a kan duh i kanmah sinak in teitu kan si kho lo; amah Pathian bia lawnglawng in teitu kan si kho lai. Amen.