Caṭialtu: Val Patrick Hrang Kep

Biadawmh:

Senri hi nihin cun kum 12 chung kan lut cang nain kan khrihfabu kong an ṭialmi cu hmuh ding a um tuk lo. Bia pakhat a ummi cu, “An khrihfabu le an i funtomnak bu(fellowship) kong theih na duh le zei thluk dah an si ti hngalh na duh ahcun an cazual chuahmi rel khawh vaa zuam,” ti a si. Nain, kannih cu kan cazual nih kan sining a langhter kho taktak lo hlah maw ti awk in a um. Cucaah, kan sining bak ṭial khawh kaa zuam . Micheu ca ah cun rel nuammi ca a si theng lai lo. Nain, micheu nih cun an rel zuam ko lai ti ruahnak he ṭial hram kaa thawk.

A hmasa bik ah mah hi ca ka ṭial tik ah pakhat le pakhat sual i phawt le lung buainak chuahter duh ruangah siloin kan sining chung ka hmuh khawh tawk le ka ruahnak nih a phanh khawh tawk hna chungin ka mit nih a rem deuh lomi, mahhi cu kan CMC zatlangnunnak ah remh kho usih, ti ka duhmi tete ka rak ṭial. Caṭialtu keimah hi ka tling bak kaa tinak siloin kei zong a chambau bak mi ka si. Cucaah, mah hi ka ca chung ahhin keimah zong nih kaa remh i ka tuah ti lo dingmi a tam lengluang ve i nangmah na palh bak ti siloin keimah zong ka palh ve ko. Cucaah, kan pahnih in kan palhnak kan i remh ahcun CMC kan zatlangnun aa dawh chin lengmang ko lai, ti saduhthahnak he mah ca hi ka rak ṭialmi si.

CMC cu minung nih dirhmi Khrihfabu siloin Pathian nih a dirhmi khrihfabu a si. Zohhmanh, Pathian dawtnak le lam hruainak thawngin Lai Christain Fellowship (LCF) thawk Chin Christain Fellowship(CCF) in nihin Chin Mission Church(CMC) tiang kum 12 leng kan kal cang. Cun khuaruahhar lo awk a ṭhat lomi cu Chin Mission Church member hna hi Myanmar ram chung hmun kaakip i a ummi chin mi hna le khrihfabu bu khat chungin a chuakmi siloin lairam khrihfabu vialte a kan funtomtu a si. Tlang dang cio, peng dang cio le khua dang cio in kan rak phan i kan holh ah kan aw-cawi hmanh aa khat tuk huaha lo. Nain, mahtin rem ṭhipṭhep le dawh taktak in a kan fun khawh hi minung nih kan tuahsernak cun a si kho lomi si. Cucaah, Pathian nih a kan umpi i lam a kan hruai ko ti cu a fiang taktak ko.

Chin Mission Church cu kha hlan Fellowship lio ruahnak in kan zoh peng ahcun kan i palh hrim lai. Fellowship cu pakhat le pakhat i hawikomhnak a si i church cu Pathian umnak hmun a si cang. Cucaah Pathian umnak hmun, Pathian inn a simi ah ningcang lo in kan um sual maw?

Pathian kan thangṭhat lio caan ah kan ṭhutnak in kan tho riangmang i pulpit cungah kan va kai. Pathi-
an ṭhatnak kong a chim rua lai tiin Pathian thangṭhat ah a rak chuakmi zapi nih a kan zoh lio ah pumpak miaknak(business) hna kan chim. Cu lawng hlah, pulpit cung kai i Pathian ṭhatnak le dawtnak hna hmanh a chim kho huaha lomi nih pulpit cung ah kan hawinu/hawipa ṭhatnak chim cu kan thiam meisei rih. Pulpit committee nih caan hmangtu ding cu bulletin in ṭhatein an ṭialmi kan hmuh ko nain caan hmangtu min ah kan min a um lo buin pulpit cung ah kan kai riangmang i nichuak capo hna kan chim salam. Pathian thangṭhatnak hmun le Pathian hmai le zapi hmai ah kan mah duhherh hna kan chim tawn. Pulpit hi mi an chiatnak chimnak(mi kong ceihnak) hmun ah a ruatmi kan um tawn.

A cunglei ka tialmi hi CMC nih kan ton rih lomi pakhat hmanh a um lo. Kan ton dih cangmi an si. Zohhmanh, CMC nih Pathian biachimnak kan pulpit kan hman ning hi a ṭha in na hmuh peng rih ahcun hmailei caan khatkhat ahcun CMC nih Pathian kan thangṭhatnak biakinn le Pathian bia kan chimnak pulpit cu nichuak capo chimnak le mah duh herh chimnak hna ah aa chuah kho te mi si. Cucaah, Pathian bia kan chimnak pulpit le Pathian umnak hmun biakinn cu ningcang lo in kan hman nakhnga lo kan i ralring a herh ko.

CMC cu media lei in kan ṭhangcho taktak ko. CMC nih kan i ngeihmi media hna hi a hman kan thiam maw tiah biahalnak um sehlaw kei cu kan thiam hrimhrim lo ka ti lai. CMC member hna zapi nih kan hman khawhmi le kan i hrawm khawhmi media hna cu Kakao group, Facebook group, Facebook page, website le Senri Cazual hna hi an si. Hi tluk in media leiah a ṭhangchomi khrihfabu hi Laimi khrihfabu lakah kanmah pin cun kutdong sawh khawh an si lai. Sinain, kan ngeihmi media a hman kan thiam lo i Pathian thangṭhatnak hmuntu ah kan duh herh, kan hawinu/hawipa ṭhatnak kong, pumpak miaknak(business) le capo hna kan chim salam. A cunglei ka vun langhtermi media chung ah, mah vialte hi langhter khawh dih an si. Pumhnak chung kan chim nak in a theitu le a hmutu an tam deuh lai . CMC facebook group hi church secretary nih thawngṭhanhnak ah a hman ti dah lo cun kan hmang hna lo. Thlatin chuak Senri cazual zong editor te nih ca ṭial an fialmi hna lawng nih ṭialnak hmun ah kan ruah. Facebook page zongzei hlei hlah. Multimedia team nih hmanthlak le video an chiahnak hmun lawng ah kan ruah . A dangdang vun char ding zong a tampi nain mah vial khan za rih seh law.

Kan duh herh, kan hawinu/ hawipa ṭhatnak kong, pumpak miaknak(business), nihchuak capo le thawngṭhanhnak pawl hna khi facebook group hna ah kan ṭial awk a si .Cun pumhnak ah thawng seh kan thanh ko kan ti ahcun kanmah thengtheng dir lo in church secretary sinin thawng zong thanh khawh a si ko. Cun Kakao group chat zong ah kan ṭial ding si. Caṭial kan i herh deuh kan ti ahcun thlatin chuak senri zong ah langh ter khawh a si. Ca na ṭialmi Laica bia na khen khawh phawt ko ahcun mah pin kha cu Senri Editor te nih an in edit piak lai i rel nuam mi ca ah aa chuah ko lai. CMC member lawngnih ka chimmi thei hna seh ti na duh ahcun CMC nih kan i ngeihmi Kakao group, Facebook group le thla tin chuak Senri Cazual ah langhter ko hna usih. Lai mi dih lak le vawilei cungpi nih thei hna ti na duh ahcun Facebook page le Website ah langhter khawh rih a si.

CMC nih phaisa tampi dih in media thilri kan cawk. Hmanthlak he video he tiin zarhfatin Multime-
dia team nih record an kan lakpiak pinah zapi hmuh khawhnak ah an kan chiahpiak ko nain pumh lioah kan phone kan i chuah riangmang in hmanthlak , video kan thlakmi hi zoh aa dawh lo hringhran ko. Powerpoint in kumpi kumkhat chung pumh awt hlanah “Pumh lioah pumpak in hmanthlak le video thlak lo ding” tiah a kan taarpiak peng ko nain nihin ni tiang kan phone kan chuah riangmang i hmanthlak siseh, video siseh kan thlak peng ko. Mah zong hi i ṭhinh kho usilaw a ṭha taktak lai.

Biadonghnak:
A cunglei ka ca bia bang CMC cu minung nih dirh ko hmanh sih Pathian tel lo cun mah cu kan dirh-
mi cu nihin ni ah hmuh khawh a si ti lai lo. Cucaah, Pathian nih a dawt i nikhat hnu nikhat in thluachuah a pekmi Khrihfabu kan si. Amah Pathian hmunkhat teah kan thangṭhat khawhnak ding ca ah rak dirhmi khrihfabu a si. Cucaah, Pathian kan thangṭhatnak hmun kan biakinn i kan i pumh lioah caan hmang-
tu kan si lo i pumh hruaitu nih pulpit cung ah a kan auh lo ahcun pulpit cung kai hi i sum pah hna usih. Pathian thangṭhatnak hmun hi lungchuak chimnak hmun a si lo. Pathian thangṭhatnak le Pathian bia kan chimnak pupit zong hi mah duh herh chimnak hmun a si lo. Pathian kan thangṭhat lio caan suimilam pahnih chungte hi cu Pathian kan thangṭhat dah ti lo thildang cu tenh hna hlah usih ti sawm pah in ka cabia ka donghter.