Dr. Aung Min Thang

Hi biahalnak te hi faak ngaingai in Korea a ummi kan Laimi lawng siloin miphundang phaisa kawl i a ummi hna nih ruah a herh ngaimi biahalnak a si tiah ka ruah.

1. Mi nih Korea i phaisa a kawlmi hna an in hmuhning hna

Korea cu vawleicung ram ṭha, ram nuam, ram rum le Khrihfa ram ah chiahmi a si ca ah kan Laimi tampi nih phanh an duh cio mi ram a si. Cu pinah Korea i kuli a ṭuanmi hna nih thla khat ah 1,800,000 Won (Kawl phaisa in 1,900,000 Kyats) hrawng nan lahkhah a si tik ah ram ṭha ngai i hlawh ṭha ngai in a ummi ah ruahmi nan si. Cucaah Korea ram kan ṭihzah le ka upat bantuk in cu ram i phaisa a kawl khomi hna zong hi upat ngaingai nan si. Tlangval, pa ṭiatum lo te zong kha Korea i phaisa kawl kho na si ahcun nungak dawhdawh nih an in duh hna lai ti cu a fiang ko.

2. Korea i a rak tlung cangmi hna nih zei dah Kawlram ah an tuah bik?

Korea in an rak tlun hnu ah Kawlram rianṭuan ding a thei lomi hi a tam deuh cu an si. Yangon i a ummi a tam deuh cu mawtaw an i cawk hna i Taxi a mawng mi an tam. Acheu cu tuah ding bak a thei lomi zong an um. Nang tah, rak tlung law zei dah tuah naa timh ve? Korea na um chung i na hmuhmi phaisa hi na thih tiang naa za cang lai maw? Na nupi le na fale nih zei can sau dah an hman lai i cun a dih lai? Ruah awk ngai a si. Cucaah lungfim a hau.

3. Laimi nih Korea ah zei rian dah kan ṭuan bik?

Korea ah Laimi nih nan ṭuanmi rian hi a phunphun a um nain, a bik in nan ṭuanmi rian cu lahkhah tam deuh nan hmuh khawhnak rian hi nan ṭuan bik. A ṭha ko. Asinain, kha rian kha Korea lawng ah na ṭuan khawhmi rian a si. Kawlram na phanh ahcun Korea ah na thiam cang mi rian bantuk kha ṭuan ding a um lo. Cutikah Kawlram ah cun rian ngei lo in na um a hau cang. Kawlram i a ummi rian cu na ṭuan zuam fawn lai lo. Zeicahtiah Korea ah lahkhah tampi a hmu bal cang mi na si tik ah lahkhah tlawmte he Kawl lak i rianṭuan hi a nuam na ti ti lai lo.

4. Korea na um chungah zei bantuk rian dah ṭuan law na chan-chung na paw khim lai?

Lahkhah a tam i Kawlram ah tuah khawh a si lomi rian nakin lahkhah a tlawm i Kawlram ah tuah khawh a si vemi rian kha Korea na um chung i na ṭuan ahcun Kawlram na tlun hnu ah rian ṭha na ngei peng lai. Biana ah, Korea rawldawr hna ah khin lahkhah a tlawm zongah rawlchuan va cawng law, Kawlram na tlun tik ah Korea eidin dawr hna na tuah ahcun Korea na um chung i lahkhah na hmuhmi nakin tam deuh na hmuh lai. Pahnihnak ah, Korea holh hna hi thiam ding tein cawng law, holh na thiam ahcun Korea holh sianginn zong na tuah khawh cun company nih thlakhat US$ 500 nih an in lak lai. Atulio Yangon ahcun mirang holh a thiammi nakin Korea holh a thiammi a let in an lahkhah a tam deuh. Pathumnak ah, Korea i an tuahmi juice te hna, changreu te hna, a dang ei supsap te hna le dinmi phun hna khi an tuah ning thiam khawh i zuam law, khakha kawlram ah na tuah ve ahcun na chan-chung vialte Korea na hmuhmi nakin tam deuh na hmuh khawh nakding lam an si.

5. Korea i rian a ṭuanmi hna nih kum khat ah ting 200 a khawng khomi cu nan har ngai lai.

Va khawng kho hmanh law kum thum ah ting 600 a si. Ting 600 nih cun Yangon ah North dagon hmanh ah inn hmun a caw kho ti lo. Khua hriang ah na cawk a hau lai. Inn saknak ca ah phaisa a herh rih fawn. Cucaah lungfim ngaingai kan hau ko hna.

Cu ti a si ca ah, Korea i na um chungte ah hin khua faak deuh in ruah a hau. Ka tlun tik ah zei dah ka tuah te lai i ka innchungkhar hi ka cawm te hna lai ti hi nan ruah a hau. Phaisa a zin tampi na ngeih ahcun tuah khawh dingmi rian a um len ko. Asinain ting 500 he hmanh na rak tlun lo ahcun Yangon ah na ṭuan dingmi rian hi a har ngai ko. Pathian nih lungfimnak in pe ko hna seh.