Innhmai tarpa vur phiah thawng “ Khu rut-khu rut” timi thawng nih a ka t`hangh. A ceu huaha rih lo nain ka mitkuh a vuai ngai. Tlanglangawng in alenglei ka zoh i horha tam ngai a tla nain, ruahnak leng in a kik lo. Thawh kaa tim. Ka kut ka hun samh hnik ahkhin phone ahun ra. Ka lau ngaingai zingkhua ceu rihlo i, phone chawnh cu dah ngai, ka ti. Tlaihding ka hun zoh cu ka dawt Diana sinin a si. “ Ka dawt, Immigration nih  an ka tlaih. Kan company ah buainak a um i an kan check tikah..” a ti a tap pah. Van ka cau. Atlun ding afiangmi a si caah zei hal lo in,“ Ka dawt, Pathian hi kan caah kanmah nakin khua a kan khaanpiak deuhtu dakaw a si, kannih cu ram ngei kan si fawn ko. Na tlun zongah na tha rak chia hlah” ka ti.  Ka bia ka hun peh rih hnik nain a phone a tla. Ka chawnh len nain atlai tilo.

Laksawng alaak lio
Nihin hi kan caah a sunglawi bikmi kan iduhnak kumkhat a tlinni January 4, 2013  a si. Sihmanhsehlaw,  ruah loning in thil a cang. Van ka zoh ah a pit cikcek. Thla ka cam; kan ico nakhnga le biatak tein kan iduhnak a feh chin nakhnga tiang in. Cun, vansan ah ka dawt Diana i a hawinu Tuluk miphun Shing Ling sinah an thawngpang fiangte hngalh duh ah phone ka chawnh, i ka hal. “ Hwasong Thong Inn ah Seoul Immigration nih  an kalpi hna lai i, thaizing in zoh khawh a silai” a ka ti. “Thomas na ngaihchia tuk hlah mu, anih cu zumh awk a tlak ko” tiah a ka hlemh. A tap pah  phone chung cun. “ Ton na duh ve maw, na duh ahcun kan kal t`i lai” ka ti le “ Ka duh ko” a ka ti ve.
June 5, 2013 zingkaa suimilaam 7:45 ah Laimi ka hawipa Alian le Shing Ling he Gumgeong Station ah iton in Thonginn lei kal ding kan ti bangin kaa thawh. Gumgeong ka phak ahhin Shing Ling hi a rak phan cang. Coffe a lummi te a rak ding pah. “ Ziah na tuan ko ee” ka ti. “ Atuan lo, minit 10 lawng pei aa duh ko hi” a ka ti. Cun, “ Aleng cu a kik tuk a chungah Alian cu hngak uhsih” ka ti i, Holy Coffe shop chungah kan lut. Zingkaa te asi nain, dawr chungah mi an rak tam ngai ngai. Cun, bia kan iruah pah in Americano Coffe  le Changreu apermi cu breakfast can ah ka ei pah. A dawtmi ahawi Diana tonmi cung ah a lungt`hat lonak kong, Korea mi nih ramdang mi an kan zoh ning le Korea arak phakkaa Korea pawl nih an rak nihsawhnak te pawl khi a ka chimh. Alung cu fah ngai dawh a si ve nain, zei cu dah kan tuah khawh hnga? Kan itimhmi khenhnak ah a si tiah, kaa sum tawn i asi, tiah a bia cu a dongter. Ni nih kan t`hutnak cu ahun cerh cang; a khim zong ka khim pah cang caah suimilaam ka zoh i 8:00am si cang. “Aize, asau tuk pei ka rak ei hi”, ka ti. “Kah!, Chuak uhsih! Alian zong a phan cang kho men” ka ti i, Hwasong Thonginn lei a kal ding Bus 330 a dirnak lei kap ahcun kan kal. Kan phan nain Alian hi arak phan rih lo. Phone hei chawn tuah hen Alian cu a ka ti i, ka hei call. “ Alian, kan in hngah ko hih! Na phan deng maw? Khuikaa dah na phak?” ka hun ti ahkhin , “ Ah! Thomas sorri bak si, Thawh ka tlolh i, minit 30 cu rak ka hngak rih uh. Chin House  in ka chuahkaa te lawng a si rih ee” a ka ti. Ka thin a ka phawh ngaingai nain Keimah nak upa deuh zong a si lengah Baible sianginn a kai lio zong a si caah zei hmanh chim loin ka um. Shing Ling cu ahmai ka khaaplo ngai. Suimilaam a zoh lelek caah chimlo awk a t`ha ti lo i, Alian atlai lai ding cu ka chim lawlaw. A ni i, amirh! “A ngah ko, Ka theih thiam ko” a ka ti. Ka theihthiam ko a ka timi ruangah kaa pahrung chin. “ aw—Laimi a caan kan upat lo a kan hngal cang rua hi mu, ka ti” .

Alian cu minit 40 arauh hnu ah arak phan. “Sorri tuk a si, Zahan zaan ka baa pah i, kaa hngilhnak ah ka lan sual, Nan hmai kaan khap hna lo” tiah a chim len. Ka thin a hung pah nain, miphun dang hmai ah mawhchiat cu at`ha lai lo tiah, “ Apoi lo” tiah ka ti ter i, Bus chung ahcun kan lut. T`hutnak t`hut dan ahnubik ahkhin kan pathum cu kan t`hu hna i, bia kan iruah hna. Laimi nih ngaihchiatnak kan ton tikah kan i ngaih chiatpinak le kan si khawh chungin kan ibawmh ning kha Alian nih cun a kan chim pah. Diana caah CCF Buupi nih phaisa 50,000won an ka ronh. Kanmah nih 50,000Won cu chap uhlaw 100,000Won in pee hna usih a ti. Shing Liang cu a lau tuk. A khuaruah zong ahar fawn. Laimi kanmah le kanmah kan idawt ning kha a hngalh tikah Laimi he aa komhmi anih zong cu aa lom bantukin a um. “ Keimah nih 20,000Won ka thawh lai i, nannih nih 15,000won veve tho uh, a kan ti i thonghra ca thlaphnih cu a chuah. Mah lioah ka rak ruahmi cu Laimi nih kan ngeihmi lungput uar a rak umning, miphun dang hmanh nih an uar ning khi ka hmuh tikah keimah Laimi sin achuak bal lomi le CCF ah aa tel huaha lomi hmanh nih khin kan Laimi sinak cu kaa uanpi. Cun, Laimi kan caaah khua arak tuaktu an si zong kha kaa fian fawn caah nihin thawk cun Laimi ka hawile sinah ka kal tawnnak nuamhnak vialte kal takin itel ve ding bia kaa rak ikam.

Ngaihchiat lakah kan biaruah athaw ngaingai caah a si rua, Thonginn kalnak ding t`umnak Hwasong Wikukin kan phan cang ee, tiah Alian nih cun a kan ti caah t`umding kan itimh. Hwasong Thonginn hi ram lakah a ummi a rak si, i thongtla pawl an zaam sual lai ti phan ah palik nih t`ha tein an kul dih. Hauhruang in an kul i, a lai ahkhin kutkaa an ser. Cu ahcun kan lut. “ Form hi phit ta hmasa ahau, Kan phih hnu lawngah zoh khawh a silai a kan ti caah Alian nih cun likmalak form cu phih ding aa tim. Form aphih dih hnu ah tlawmpal kan hngah i Diana zoh khawhnak ding room hmete lei ahcun kum sawmli hrawng a si cangmi Korea nu nih a kan hruai.

Thongtla zohnak room hi pariat a um i, a kenbik ahkhin Diana cu arak chuak lai a kan ti caah Room 8 ahcun kan hngah. Aleeng le achung karlak ahhin Tlanglaang nih a dan i, kan aw itheih khawh nakhnga phone an chiah. Cu ka hmuh tikah phone in muihmuh bu ichawnh ding a si kha kaa fiang. “Minit 30 lawng caan kan ngeih caah ahmasabik ah thla kan cam hmasa hna lai” , tiah Alian nih cun a ti caah Diana a rak chuah sinin thlacam cu kan thawk. Hi lio thla ka rak cammi ahhin Pathian hi amawh  in ka rak mawhchiat, “ Ziah Pathian, na kan dawt ko ahcun Diana he atu bantukin it`hen ding hi khua na kan khaanpiak e” ka ti. Ka mit kaa au Diana cu ka zoh. Thongtla thuam te he a si tikah ka ngaih achia khun. Ka kut kaa tum. Ka ha cang kaa rial. Zei tuah awk te ka hngal lo lioah ahkhin Alian nih a thlacam cu a dihter. Shing Ling cu nu asi caah a mitthli a tla, Atu hi ahnu bik kan iton asilai ti a hngalh caah alung afak khun, “ Diana, Kawlram na phak zongah facebook silole oovoo in kan ichawn tawn lai mu, Sersiamtu nih at`ha a ti ahcun kan itong t`han te ko lai” a ti. A t`ap, Acaal aa domh pah in a sam cu ahnu lei ah a hei. Diana zong a hawi dawt he it`hen ding cu arak celh hrim ve lo caah at`ah len zong khi ka hmuh. Nain, phone in an ichawhmi asi caah Diana nih zeidah a chim ti tu cu fiang huaha in ka thei kholo. Acaan tamtuk kan ngeilo kha Shing Ling nih ahngalh caah Diana, na tha chia hlah mu” tiah a ti i Phone cu keimah a ka peek.

Zei bia in dah hlemnak ka thawk lai ti ka hngal lo. Ka ngaihchiat tuk a ka hmuh ahcun acelh lai lo ti ka hngalh caah, “ Diana, Duhnak timi cu ahmunmi a si ko. Kan dawt zungzal ko lai, kan duhnak cu na t`hatnak lawng a duhmi khi asi lo, Na chiatnak siseh, na t`hatnak siseh, kan duh dih mu. Kawlram na phak tik zongah kaan philh hrim lai lo. Tuchan cu IT chan asi cang i, foi te in kan ichawn lengmang ko lai, rak ka zum law, rak ka hngak peng mu” ka ti. Ka bia atheih tikah a celh ve hrimlo nain kan iduh ruangah a celh lonak cu langh terlo ding aa zuam. “Ka dawt Thomas, Nang cu zumh awk tlak na si, Zeitik hmanh ah kan kal tak bal lai lo. Kan hngah zungzal ko lai. Mi nih ka kong an chim zong ah rak zum hlah mu” a ka ti. Kan mit aa tong, kan mitthli kan ihmu veve nain kan ihnawhpiak kho lo. Thlalang ka mawi, a kutte nih ka kut arak tongh ve. Na belte in Tlanglang nih a kan dan. Ka dawt, kan duhtuk philh hlah mu, na lungthin te ka si kha mu” a ka ti. “Kan duh tuk ve, kan ico laimu” ka ti. “Rak ka hngak zungzal mu, kaan pekmi kutdong hrolh te kha rak ihrolh pengmu. Kan biakhamnak a si kha mu” ka ti.  “Aw ka dawt” a ka ti i bia apeh hnik lio ah “ A caan a dih cang ee chuak cang uhlaw” tiah thonginn hngaktu Korea nu nih cun a ka chimh. “ Kan sianglo, kan duh tuk, kan i co lai mu” ka ti i, phone te cu ka poke, cun “ Ka philh hrim hlah mu, ka ti i, cu tin cun thonginn cun kan chuak tak.

Hi lio caan ka ngaihchiat dan hi arak mak ve. Seoul ka phak tiang hin ka celh hrimlo. Kan t`in pah ah ka hawipa Alian nih Laimi thla an cam tawnnak Gwanhak thlacamnak tlang ah a ka kaipi i kan sining vialte caah thla a kan campi. “ Pathian, kan sining vialte a hngal dihtu na si, rak ka peko mu Diana hi” tiah thla ka rak cam ve. Diana hi ka mitthlam ah nihin ni tiang acam peng rih. Kan kal tawnnak Namsan Tower, Yoeido Park hrawng ka phak hrim khin cun ka celh hin lo…..! Ngaih zawn ahkhin, “Maw ka thin” ka ti tawn. Diana a tlunnak hi thla 4 a si cang nain, zeihmanh thawng a ka thanh tilo. Kan pahnih kan ithlak tawnmi hmanthlak le video dah ti loin Diana ka hmu kho tilo. Atu lelek ka zoh tawnmi a facebook wall le ka rel t`han tawnmi kan ichawn tawnnak Kakao Talk message pawl. Diana a rak tlun kaa hi Love song pawl ka rak ngai ngamlo, zaan ah ka rak hlam i chun ahcun ka rak ngai tuk tawn. Zaanmang ahcun ka ton theo tawn rih nain, alengah a muithlam zeihmanh a sem tilo.

Ka biakam bantukin Han river pawngah a ummi CCF ahcun kaa pum peng tawn. Nikhat cu Kawlram lei in arak tlawngmi Pi Cer Iang T`ial arak phan ti, ka hawi le nih an ka chimh caah ka lungthli te cun Diana sin in cakuat hmuh ding kaa rak iruah len. Pi Cer Iang T`ial hi NGO ah rian a t`uanmi asi caah Kawlram le Korea ahlat lengmangmi a si.  Pumh dih cun CCF biakinn tang dotthumnak ah coffe kan ding. Cu lio ahcun Pi Cer atlunnak Inn ngeitu nih , “ Kawlram lei in cakuat na sin a rak phan, a ho dik asi” tiah arak ka pek. Rel lai kaa ngaih tuk. Ka nu le ka pa si hna hlahseh! ti ka rak duh ziar. Lungt`ur buin ka hun samh! Acung bik tlangah ka dawt Thomas tiah aa t`ial. Ka hun relmi cu:-
Ka dawt Thomas,
Tluangzaadang ram in ca kan kuat, Na dam lio a si ko lomaw? Kei zong ka dam. Ca zong kaan kua kho bal lo i, na hmai zong kan khaap lo ee. Ka sual tuk, rak ka ngaithiam ko mu an ti ngam ding zong khi ka si tilo. Mah ti ka ti tikah , a ka duh tilo ti cun rak ka ruahpiak hrim hlah mu. Ka nule ka pa nih Biaknak dang he naa um ahcun kan chungin kan it`hen lai an ka ti. Thomas aw.. kan duh tuk ko ee. Naa belte kan van ai ton rua lo mu. Atuhi ka nule ka pa nih Pa Luai he t`hit umnak tuahding in bia an khiah cang. Ka al len hna nain ka al kho hna lo. Rak ka ngaithiam ko mu.  
An daw pengding
Diana….

A cakuat ka hmuh ahhin zeihmanh ka rak ruat kho lo. Ka kha kaa domh. Van ka cau. Thla ka cam. Aw.. Leicung duhnak kan timi hi mah hi maw a si ko ee, ka ti. Naa belte in bia pakhat ka khiahmi cu “ Pathian nih a dawtmi fapa ka si caah amah nih ka caah pakhatkhat a ka chiahpiak i asi hrimlai. Ngaihchiat in ka um awk a silo” ka ti. Cun, Haan river lei ah ka kal i Diana nih arak ka peekmi kutdong hrolh cu “ Nang le Kei Immigration Ruangah Maw Kan tian” tiah au bu in ti a thuhnak lei bik ah ……………………….