Van Van le Sui Sui hi Laitlang chung ~io tiva le Lahva karceh khua, Tlang Lo khua ah a ummi an si. Semmawng khup`hi lio caan in a rak i duh veve mi an si i, an hon i umh ah hin an i lunghmuih khun tuk. Fatir ah faphir an ngei hna i, Lian Lian le Dawt Dawt an ti hna. An nu le an pa an i dawh i anmah unau zong an i dawh i duh an nung tuk. Khua lai i lam kam ah inn dothnih cungah khin donh hlei sang khun an sakmi khin khua le ram an lang hna i, khua cuanhnak ah a rem tuk. Cuka cun Khual Hring tlang, Zahau ram, Mar ram hna, T`io tiva le Lahva kuang hrawng hna an lang. Van Van le Sui Sui cu voikhat caan ah lo ah an va kal `i. Maw`aw Saikel khin an hei kal i, bag chung ah khin Zil pum, Mai pum hna le anhring an sanh hna i dinh hmun tlaitlan ah an i din. Cuka hmun cu khua zaza an lang hna i lung a leng tuk. An `hutnak cun Van Van nih Sui Sui cu a hun cawnpiak. Ka dawt Sui … ~io tiva cung i a zaammi khi “Tichum” an ti. Furpi i ruahsur thlu ka i khua cung tiang a hung zaammi khi “Minmei” an ti. Cung vansang i a tomtom in a ummi khi “Khuadawm” an ti i, cung sang i pan nawn tein a ummi hna khi “Vannang” a si loah “Vanraang” an si. Thalcaan i tlang kip i a zaammi khi “Romei le meithang” an ti hna. Khuasik caan i tlang kam i catlang rinmi bang ding zirzer te a zaammi  khi “Sihmei zaam” an ti hna  a hun ti i, nuam ti niakmak tein bia lungduh an i ruah hnu  ah inn lei ah an tlung. A nuam ko, a nuam hrimhrim ko. Vawleicung i dawt cemmi i a dawt cemmi hong si le `uan rel `i cu cim khawh lomi le vuai khawh lomi lomhnak in a khat ko. Voikhat cu zanriah an ei dih in an nu pafa rual cun
inncung lei donhhlei cungah an `hu hna. Zan thlapa nih vang pempum in a ceu. Cunglei arfi hna nih de `hi`hiai in an ceu.Van Van nih cun vancung lei i, arfi hna min khi a hei chimh hna.Hei zoh u law.. a `hep delhmalh mi arfi khi “Fidi” an ti. A `hep lomi arfi khi “Fino” an ti. Paruk a bu tein a ummi khi “Firuk” an ti hna. Arfi ngan deuh hna khi “Fitlaw” an si. Ai `hialmi arfi hna khi “Fizaang” an ti hna i, a khumi khi “Fikaang” an ti hna. Artlang in arfi pathum a ummi khi “Likuk can thum” an ti hna i, Pathum a laita a fual deuh mi khi “Vok te lawng zawn” an ti hna. Arfi ngan deuh pahnih naih deuh in a ummi khi “Maw fa thiam `ial bih” an ti hna. Zinglei i dei lai ah a hong chuakmi khi “Deirel” an ti i riangrang ngaingai in a zuangmi  hna khi “Lasi fung khawh” an ti hna, a hun ti hna i an i nuam tuk.(Note: : Ka pa chimmi chung in lakmi). Minung hi kan ngeihchiat caan ah thlapa ceu le arfi ceu zoh tik ahcun daihnak an kan phurhtu an si a hun ti hna. Cu ka hmun ah cun pa le fa, nu le fa i pom buin len lio caan hna cu vawlei chaw hlawnnih a cawk khawh lomi nun nomh caan sung a rak si. Aw… a sunglawi ko, a sunglawi hrimhrim ko. Zei caah tiah vawilei cung i dawt bikmi nih a dawt bikmi kan hong si le fanu, fapa dawt hna he len cim lo kan len`i caan nak in nun nomh dang a um ti lo cu ta.  Sau kan thu rih rua lo, an ti lio ah khin khua lu lei in meithal puah thawng cu a hong thang. Thawng dang ngai in an hna an hun tun. Cu thawng cu lai ralkap le kawl ralkap i doh thawng a si. Meithal puakmi kar ah cun ai thawng le hram thawng cu a hong thang pah leng mang. Meithal thawng cu a puak thluahmah i `ih a nung tuk. Khualu lei inn hna an hong kang. Khualu lei mi hna kha khuataw lei ah an zam hna. An tlik lek pah khin pa pouhpouh zam uh, pa poupouh zam hna seh tiah lamtluan a hong au. Aw!! `ih a va nung thiam dah. Kan pa, na kan zam tak ahcun zeitindah kan um ngam lai an ti. Inn chung ah an hong lut i, a pa thil cu rianrang in an timhpiak i an nufa rual in hauka lei ah an va thlah. Zan thlapa ceu tang ah cun.. Papa..Papa…hong kir `han te ko mu…hong kir `han ko mu..i ti bu in an hon i `hen riangmang ko. A pa a liam hlan lo cu an hei zoh i an nufa rual cun an kut an hei zoh leng mang bu le biangno tete cungah mitthli a luan pah bu cun a liam riahmah ko. A pa cu Mizo ram in Delhi khuapi ah a va zaam. Holh pei he Kala sin ah sal rian a cu `uan. A mah ei ding hmanh a hmuh kho `hi`ha lo. A nupi le a fale cu har rilrial tein loram rian hrang tuan ah cun an re  a thei. An ngeih ciami satil le thilri hna kha an zuar hna i an hong har deuhdeuh. Ngak`ah fa bang mi zoh hawi hngar te in an um. Kum hnih a hong rauh  cun an pa cu U S A ram a va phan i      i phaisa a hun kuat pah khawh hna. Phaisa an hmuh cun an i lawm tuk. An pa mui hmuh can ai ah an ti i, an i lomh tuk ah an mitthli a tla. Maw..Papa kan in ngai tuk cang ee..an ti i, an hram tawn. Sui Sui cu an pa phaisa kuatmi cun thuam `ha`ha le eidin `ha`ha in a hon i thuam mawi i aa dawh chinchin. Pa ngei lo hrat cu rian bawmtu ah an i sawm tawn mi Duh Tlong he an i chok `i tawn. Beer, Zuu khi an ding tawn i, an nu cu a ri pah tawn.  An hun ding deuhdeuh i ningzah zong hngal loin an in ah a riak tawn. Sui Sui nih cun a lawi lai sian lo tiang a duh i, zan ah an it `i tawn. A fa le cu an thin a hun zong ah zeihmanh ah a rel hna lo. A hro hna i a tlerh tawn hna caah an `ih tuk. An nu he ihkhun ah an it i, an nih `uang ah mitthli he an it tawn. An lung a fak tuk nain a nu thangchiat lai le a pa lungfah lai an phan caah midang sin ah an chim ngam bal lo. A sinain khuami nih an kong a thli tein an hon ceih phai pah cang hna. Van Van cu kum sarih a rauh hnu ah USA ram in a nupi le fale la ding in kawlram ah luh ding in India ram Mizo lei in a hong tlung. Kawl ram ramri a phak ah khin an nu thawngpang biathli an i ruah mi cu a theih. A ngaih a chia i a lungkil te cun tlun i ton hmanh a zenh tuk. Zaan tlai nawn ah khin khua ah a hong lut i, an inn tual a  hnu phan. Tual par cun Lian Lian le  Dawt Dawt, ka fa le hna.. nan  pa ka tlung ee.. ti in a hong au. A dawtmi an nu le a fa le nih an hun ka zuan hnawh lai i, kan kut kan i tlai `i lai ti hi  a ruah i a hngah hlang tukmi a rak si. Cu zan cu Duh Tlong nih an nu a riah zan a si caah ihnakkhan an i hrenh khumh i, diriam ngai in caan an hmang. Sihmanh sehlaw a fale cu `uang kik ah mitkuh cim kho lo in puan tang ah a thli te in an `ap. ~a Lung le A Dawt… ka fale, pa pa ka tlung ee..ti thawng cu an hon theih le cang ka cun an tho i an tual lei kut ka cu hon ding in an tli. An pa aw an theih cun an i lawm tuk. Pa pa,, pa pa..tiah an ti i a tak ah cun an hun i beh. An i lomh tuk ah an biang ah mitthli a luang. Van Van nih cun na nu teh! a hun ti lio ah cun holh ngam lo tein an um. An mitthli lawng a hai i inn chung ah ti tiang lawng an chim ngam. Tual par i donhhlei cungah cun an hong `hu hna. Van Van nih cun inn ka an hun hon lai i, an nu nih na tlung cang maw a ka ti `heu lai ti cu a ruah na in zei aw thlam hmanh a leng lo. Voidang lo ram rianhrang a `uan caan i a tlun tawn hmanh ah A Dawt pa.. a ti i a zah in a zah tawn mi kha a tho duh ti lo. A ningzah loin Duh Tlong he cun duh pouh in ihnak khan ah cun cu an um`i ko. Van Van thinlung cu kuai thlu le man thlu a zaal cang. A lungfah maw a fak deuh a ningzah dah a fak deuh theihthiam a har ko. A no lio i a duh tukmi hla pakhat kha zan i ngaknu leng a tin mipa nih a hun sak.
“Hong kir`han ko law
Par khat pom iang
Santlailo kei lung ngamnak ah
Tin zai hla in sawm ning law
Ka dawt kir`han um hnga maw”.. timi hla aw a si .

Sui Sui zong nih cu aw te cu a theih i, a hong tho. Thlalangawng in a hon bih hna. Pa fa rual te an i kuh i an i pom cu thlaceu tang ah a hun hmuh hna tikah a thinlung kuai thlu le man thlu a zal ve. A ka in dim te in bia a hong chuak mi cu..a poi ee.. a poi ee… Dawt Dawt pa a tlung ee… a ti i a mitthli cu tuang cung ah hnawh cawk loin a hei tla. Van Van cu a thinhun le a ningzah lawng si loin a hmailei kong a hun ruah ah a lung a dong. Ka fa le a poi tuk ee… a ti i a mitthli cu hnawh cawk lo in a biang ah an hong tolh. Ka fa le thaizing hi a hmai ka khap hnga maw? Khuami hna le A Dawt nu hmai hrim ka khap hnga maw a ti i thin sivang in a hram. Lian Lian nih a pa cu a zaang a fak tuk i, Papa .. a poi lai lo. Hi inn hi kanmah inn a si. Hlanlio ah Lian Lian ka nun lio ah cun pa pa inn a si. Ka thih hnu ah cun Lian Lian inn a si..na rak ti, tho law kan inn ah lut usih a hun ti. Dawt Dawt nih cun Papa na zam lai zan ah pei nan lungre a theih caan ah cun arfi ceu no tete khi zoh hna u law daihnak an pek hna lai na rak ti kha. Ka Papa tho law inn chung ah lut sih a hun ti. Van Van nih cun, ka fale.. ka nunnak kawltung le chunmang vialte a rawk dih cang. Hi vuleicung nun hi ka huam ti lo. Na nu cu hun chim te u law vancung ram in ka rak in don te hna lai tin a hun ti. A bag chung in i hngilhnak sii a hun chuah i tam tuk deuh in a hun din colh. Sii a hun din mi cu a cak tukmi a si caah bia a chim lio ah khin a hong thlep ziahmah i donh hlei cungah cun a hong zau. Daite khin a um i duhsah te in a thaw cu a hong dai deuhdeuh i a thaw cu adong colh  ko. A fale pahnih nih cun an hninh lengmang i, aan zeihmanh a ngei kho ti lo. A kuai cang mi palang thawl cu peh tonh awk a `hat ti lo bantukin a nunnak cu ser`han awk tha ti loin a dih colh ko. A fa le cu mitthli hnawh cawk lo cun an hong `ap i a nu zong cu rianrang ngai in inn cung cun a hong `um i an `ap ti. A Dawt  pa .. na farnu mi sual nu ka ra cang. Tho law bia i ruah ta usih. Ziah kan in ngaih a cim rih hlan ah lung awi lo tein na liam colh ee.. a ti i a `ap. Hi vawlei nih hin a caah ruahchanawk zeihmanh a chuahpi kho lo in a theih caah a liam colh ko. Dawt Dawt cu a thin a hung tuk i.. Ka pa.. ka pa.. liam ko law.. ka nu nih an daw lo tuk i na thih ah a `ha deuh, Ka pa mi nunnem te mang tha mu… ti in a `ap. Ca reltu.. Nu le Pa, U le Nau hna ralzam nun nih hin mi zeizat dah a kan `hen? Khua le Ram hna zong sian lo bu tein kan liam tak leng mang tawn, maw kan khua, kan chungkhar hna ngaih nan um tuk cang ti. Ramdang miphun dang le mi ram mikhua kan um ah kan tantakmi kan chungkhar kan nu le pa hna kan ngeihnak hna hi a kan theithiam piak hna hnga maw? Chungkhar tling tein kan rak um`i lio caan hna kha zeitluk in dah a rak nuam i a rak sunglawi. Kan dawtmi, Ka pasal, kan nupi le hna caah le kan chungkhar caah ngeihchiat tertu maw kan si sual hnga maw. An chunmang le an kawltung a rawktertu hna kan si sual maw? Aw.. a va har hringhran dah. Aw…. Ral zam nun a fah hring hran cu mu. Ca reltu pakhat cio nan cung ah Pathian nih lam in hruai in thluachuah in pe chin ko hna seh.

By: Van Lian Thawng