American Civil War veteran William Jackson Smart fanu Sonora Smart Dodd (Feb.18.1882 Jenny Lind, Sebastian County, Arkansas) nih a rak thawkmi Father’s Day kan hmannak hi kum 100 lengkai kan lut cang hna. Mrs. Sonora nih harsatnak phunkip paltlang in aa zuamnak nih nihin ah cun ram tampi hna nih innchungkhar ah lubik a simi pale hi zeitluk sunglawi dah an si timi an kan hngalter ṭhanmi hmuh tikah lunglawmh awk ngaingai a si. Nain scholars cheukhat hna nih an tuak ning ah Father’s Day conglawmhnak hi kum 4000 leng hrawng khan rak hman cangmi a si tiah an ti. A tanglei ah fiang deuh in vun zoh tuah hna usi.

Pa Ni Rak Hman Hmasanak Tuanbia

Scholars cheukhat an zumh ning ah ‘Pa Ni’ a thawhkehnak hi a hnubik i a hung langmi (latest phenomenon) thil (atu Father’s Day kan hmanmi) hi a si lo. Father’s Day hi Babylon a rawhral lio hrawng hin Pale upat peknak hmelchunhnak hi a rak um cang timi hi an zumhning cu si. An record ah kum 4000 lio hrawng hin pa hngakchia a min Elmesu tiah auhmi pa nih a pa upat peknak ca ah tlak in sermi catlap (clay card) hmang in ca a rak kuat. Cun Elmesu nih Babylon ram pa vialte cu ngamdamnak le lu-nun saunak ngei dingin a saduhthah a rak langhter. Hi hnu Elmesu le a pa kong hi record a um ti lo. Elmesu nih a rak hmanmi Father’s Day hi zungkhar ni tiangin rak hman a si lo tik ah a hnu ah cun a lo ṭhan ve.

US ah Pa Ni Tuanbia

Tuchan Father’s Day conglawmh hmasacemnak cu USA in i thawk i vawlei kildeng tiang a phan cang. Ram tampi le miphun tampi hna nih Father’s Day hi ulhmi le sunlawih ciomi ni zong ah a hung i chuah. Vawlei mi tampi nih Mrs. Sonora a thil tuahmi cungah upat hmaizahnak an pek.

Mrs. Sonora nih kum 1909 ‘Nu Ni’ thawngṭha chim a ngaih lio hin ‘Pa Ni’ conglawmhnak zong hi tuah si ve seh ti hi a lungthin chungah a um. Kum 27 hrawng a simi Mrs. Sonora nih nule upat peknak hmanh a um ahcun zeicahdah chungkhar ah lubik a simi pale cu upat peknak ni cu kan serpiak ve hna lai lo tiah a rak ti. Mrs. Sonora kum 16 a si ah a nu (Ellen Victoria Cheek Smart) cu naucung in mual a rak liam. Cu tikah a pa nih a fale pa11 ruk (Ellen nih a hrintakmi bawhte telh in fapa 5 le Sonora) cu a cawmken hna. A pa sinin a hmuhmi dawtnak ruangah fakpiin a pa upat peknak ca ah Father’s Day tuah kha aa zuam.

Mrs. Anna Jarvis nih a thawmi Mother’s Day conglawmhnak nih Mrs. Dodd a lungthin chungah fakpiin rian a ṭuan. Cu tikah Dodd nih US ah Father’s Day conglawmh dingin campaign a rak thawk i forhfialnak zong a rak tuah hna. Dodd nih a chuahpimi ruahnak cu the Spokane Ministerial Association and the local Young Men’s Christian Association (YMCA) nih hnatlakpinak an rak ngeih i June 19, 1910 kum ah a voi khatnak bik Father’s Day cu an rak tuah.

President Woodrow Wilson nih 1916 kum lioah Spokane khua Father’s Day conglawmhnak ah Pa Ni hi zungkhar ni ah ser a duhnak zong a chim nain Congress phu hna nih chawlehthalnak ah a can sual lai kha an phan ca ah an hnawl. President Calvin Coolidge nih 1924 kum ah Pa Ni cu ram mi hna nih ulh ni si dingin forhfialnak a rak tuah hna nain ramchung bia chawkvai (congress phu hna nih an soisel) ruangah rak phih ṭhan a si.

Maine Senator Margaret Chase Smith nih 1957 kum ah hringtu nu le pa pahnihte kan ngeihmi chungin ‘Nu Ni’ sunlawihnak kan tuah lioah Pale upat peknak ni cu kum 40 chung nan hnawl (a hmu lo bantuk tein nan um) tiah a rak soisel hna. Presiden Lyndon B. Johnson nih 1966 kum ah ‘Pa Ni’ conglawmh upat peknak ni cu June a zarh thum nak ni ah tuah si seh a rak ti. Cu ti kum ruk a rauh hnu ah President Richard Nixon nih 1972 kum ah ‘Pa Ni’ cu zungzal ulh ni si dingin kutzung namnak a rak tuah. Mrs. Sonora Smart Dodd cu the World’s Fair in Spokane nih 1974 kum ah upat peknak an rak ngeih. Cu hnu kum li a liam hnu 1978 kum, a kum 96 a si ah hi vawlei harsat tuarnak in zungzal retheih a um ti lonak hmun Pathian sinah aa dinh hi a si.

Zohchihmi: history of father’s day